Baddegama: මෙගා ගිගා මතක

දැන් අවුරුදු තිහට කිට්ටු පොරක් නං ඔයාට මේ මතකෙ සුපිරියටම තියෙනව. මොකද ඔයාලා තමයි ඩිජිටල් ඇනලොග් සංක්‍රාන්තියේදි තාක්ෂණේට අතගහපු එවුවො. ඒ අතගැහිල්ල නිසා සැළකිය යුතු ගාණක් ඒ අයට ඒ කාලෙදි වියදං වුනා වගේම හැමදේම මැජික් වීමක් ඒ අයගෙන් දකින්න ලැබුනා. අන්තිමට වෝක්මන් පාවිච්චි කරපු, මුලින්ම හෑන්ඩ් ෆෝන් පාවිච්චි කරපු තරුණ පරම්පරාව තමයි ඒ. දැන් අපි මෙගා ගිගා ගැන ගාණක්වත් නැතුව ඔහේ කියෙවුවට ඒ ගැන ඉස්සරනං තිබ්බෙ පොඩි ගෞරවනීය හැඟීමක්.

1. ඩිස්ක් ස්පේස්

Source – mdata.yandex.net, pixabay.com

හාඩ් එකේ තිබ්බ ඉඩ කඩ තමයි ලොකුම කතාව. ගිගා 20ක හාඩ් එකක් තියෙන කම්පියුටර් එකක් කියන්නෙ ඒ කාලේ ලොකු සීන් එකක්. ඒක පාටිෂන් කරනව කෑලි තුනකට විතර. දැන් මොකෙක්වත් ගිගා සීයෙන් පල්ලෙහා පාටිෂන් එකක් ගැහුවොත් ගහන්නෙ සිස්ටම් එක දාන්න විතරයිනෙ. ඒකට ඒ කාලෙ 128mb යූඑස්බී පෙන් එකක් තියෙන එකාට රජෙකුට වගේ සැලකුවේ. ඌ පෙන් එක ගෙනියන්නෙවත් නෑ කොහේවත්. ඒකත් ට්‍රාන්ස්එන්ඩ් (Transcend) බ්‍රෑන්ඩ් එකෙන් ගැහුවෙ රුපියල් 4000කට විතර. මේ කියන්නෙ 2003/04 කාලෙ.

2. මස් කඩේ

Source – foliovision.com

හැම සති අන්තෙම අනිවාර්යෙන් යන ගමනක් තිබුනා. ඒ තමයි ටොරන්ට් බාන යාලුවගෙ ගෙදර හාඩ් එක ගලවන් ෆිල්ම්, ටීවී සීරීස් දාගන්න යන එක. හැම සතියෙම ෆිල්ම් පෙරේතකමට ගලවන නිසා සීපීයූ එක කොයි වෙලෙත් මස් කරල තියෙන්නෙ. ඉතිං ඒක අස්සෙ දූවිලි බැඳිලා. අයිය ඒක අස්සෙ තහනං උත්තේජක හංගලා ගිහින්. මකුළු දැලුයි, තහනං උත්තේජකයි, ඕල්ඩ් ඇරැක් බාගෙ බෝතලුයි වගේ හැම දෙයක්ම ඒක ඇතුළට දාන්න හුරු වුනේ අපේ ගිගා බයිට් සේවනේ හින්දා තමයි. ඇයි හැම සතියෙම හාඩ් එක ගලවන්න පුළුවන් වෙන්න ඔවුව ගලෝල තියන්න එපැයි.

3. හාඩ් කතා

Source – thehackernews.com

ඒ මදිවට ලොකු හාඩ් නැති නිසා සල්ලි එකතු වෙන විදියට සෙට් කරගත්තු හාඩ් තුනක් විතර තියෙනව. ඔවුවයෙන් සිස්ටම් එක දාපු හාඩ් එකට ප්‍රයිමරි දීලා බස්පෝට් ගහල අපි නිකං ඉංජිනියර්ල වගේ බස් එකෙන් ගෙදර ගියේ. කොන්ටම් ෆයර්බෝල් (Quantum Fireball) වගේ පොලේ ගැහුවත් අවුල් වෙන්නෙ නැති හාඩ් ඩිස්ක් ඒ කාලෙ තිබ්බා. ඒකට දැන් මේ එස්එස්ඩී උලවු. සාක්කුවෙ දාං ගියාමත් අවුල් යනව.

4. රැම් එක

Source – xtremerain.com

හාඩ් එක ගාවට ඊළගට ගණන් ගත්ත එක තමයි රැම් එක. පරණ පෙන්ටියම් 2, 3 කම්පියුටර් වල රැම් බුරුල් වෙනවා හිටු කියල. හෙන කට්ටක් ඒ කාලෙ. එක පාරක් මගෙ යාලුවෙක් සෙකන්ඩ් හෑන්ඩ් කම්පියුටරයක් අරගෙන ගෙදර ගෙනෙද්දි කම්පියුටරේ වැඩ නෑ. ආපහු ගෙනිච්චා කම්පැනියට. එතනදී රැම් එක බුරුල් වෙලාය කියල ඒක හයි කරලා එවුවට මොකද ත්‍රීවීල් එකේ ගැස්සි ගැස්සි ගෙදර එද්දි ආයෙ රැම් එක වැඩ නෑ. ඇඟිලි ගහලා වොරන්ටි කචල් වෙයි කියන බයත් එක්ක ආයෙත් ඒක උස්සන් කඩේට දුවන්න උනා. අන්තිමට ගම් ඩොට් එකකුත් තියලා ඒ අය අලවලා දුන්නහමයි ගෙදර ගෙනාවට පස්සෙත් කම්පියුටරේ වැඩ කරන්න ගත්තෙ. ඒ කාලෙ රැමුත් ඉතින් මොනවද මහත්තයො 16, 32, 64, 128 වගේ මෙගා බයිට් කෑලි තමයි. ඒ උනාට රුපියල් අස්ප ගණන්.

5. ඩවුන්ලෝඩ් වේගේ

Source – coub.com

ඔය දැන් අපේ උන්දලා ඉන්ටනෙට් සර්විස් ප්‍රොවයිඩර්ලට බනින එකමනෙ වැඩේ. ඔන්න අපිට සින්දු ඩවුන්ලෝඩ් කරනව කියල උලවුවක් ඕන වුනේ මුලින්ම ඉරාජයා රනිඳු එක්ක අහංකාර නගරේ කරපු කාලෙ. හම්මේ සනීපෙ. සින්දුවේ ඕඩියෝ එක ඩවුන්ලෝඩ් වෙන්න ගියා පැය බාගයක් විතර. වීඩියෝ එක ඩවුන්ලෝඩ් කරන්න කිවුවෙ ටොරන්ට් බාන එකාට. දැන් මේ බනින උන්දැලාට මෙගාබයිට් තුනක් බාන්න පැය බාගයක් ගියානං බලන්න තිබ්බ ෆේස්බුක් එකේ කුණුහරුප පලන හැටි.

6. ප්‍රොසෙසරේ

Source – reddit.com

මේ අනිත් එක. ඒ කාලෙ මේ ප්‍රොසෙසරේ ස්පීඩ් එක ගැන අපිට මහලොකු දැනුමක් නොතිබ්බත් ගේම් සීඩීස් වැඩ කරනවද නැද්ද කියල බලන්න මේ ස්පීඩ් එකයි රැම් එකයි බලන්න අපි පුරුදු වෙලා හිටියෙ. පෙන්ටියම් III 500-800 මෙගාහර්ට්ස් කම්පියුටරයක් තියන පොරක් කියන්නෙ සෑහෙන පොරක් තමයි. අනික කම්පියුටරයක් තියනව කිවුව ගමන් අහන්නෙත් පෙන්ටියම් කීයද කියලනෙ. පෙන්ටියම් 4 ආපු මුලදි 1.7 ගිගාහර්ට්ස් කම්පියුටරයක් ගත්තා ගෙදරත් එක්ක යුද්ධ කරලා. බලන්න එපායැ ඒ කාලෙ මට තිබ්බ පිළිගැනීම. කාමරේ නිකන් ගේම් සෙන්ටර් එක වගේ වෙලා තිබ්බෙ.

7. ෆ්ලොපියක්

Source – sociable.co

ළඟදි හම්බුනා පරණ මතකයක්. ෆ්ලොපී දාපු පෙට්ටියක්. මුල්ම කාලෙ තාක්ෂණික වශයෙන් දියුණු පාසල් සිසුන් අතරෙ නෝටි පින්තූර සහ ටයිප් කරපු කතා මාරු වුනේ මෙගාබයිට් 1.44ක් තිබුණු ෆ්ලොපියෙ තමයි. දැන් ඉතිං භාවිතෙන් අයින්ම වෙලා තිබුනට ඒ කාලෙ අපේ මතකයන් රැස් කරලා තිබුණු දෙයක් තමයි ඒ. ඒ කාලෙ අපි ගිය කම්පියුටර් පන්තියක ඇතුල් වෙන හැම ළමයටම ෆ්ලොපී ඩිස්ක් එකක් දුන්නා. ඔක්කොම කොල්ලො ටික ඇවිල්ල තිබුනෙ ෆ්ලොපී ඩිස්ක් එක ගන්න.

8. කැමරා

Source – deccanchronicle.com

ඔන්න අනිත් ප්‍රමුඛම මෙගා මතකයක් තමයි මේ. මුලින්ම ආවෙ VGA Camera. ඊටපස්සෙ ලොකුම කැමරාවට කියල ඉහළ පිළිගැනීමක් ඇතිවුනේ 0.3 mega pixels අගයක් ගත්තු කැමරාවකට. දැන් ඉතිං මෙගාපික්සල් 16 ෆ්‍රන්ට් ෆේසින් කැමරා තියෙන කාලෙ 0.3 mega pixels ප්‍රධාන කැමරාවකට ආල වඩපු අපි ගැන ඔයාලට ලැජ්ජාවක් ඇති වුනාද? කිසිසේත්ම නැහැ නේහ්!